Biography

Aapka janm 01 January 1971 mein Hazrat Irfan Ali Siddiqi Sahab (R.A) ke yahan hua. Aap Asharfa, Nanpara mein paida hue jahan zyadatar log ya toh Sayed hai ya Siddiqi hai. Aap Hazrat Abu Bakr Siddiq Raziallahu Ta'ala Anhu ki aulad mein se hai. Bachpan se hi Aapko yateemo aur gareebo se muhabbat thi chaahe koi bhi dharm se ho. Bachpan mein Aapka zyadatar waqt bhookho aur gareebo ko khana khilane aur unki madad karte beet ta. Aapke bachpan ka waqiya hai ke ek Jain sadhu Aapke ghar ke saamne se guzar raha tha. Aapne use dekhte saath hi aawaz di aur khana khilaya. Usne rote hue Aapse arz ki ke maine 3 din se khana nahi khaya hai aur mujhe kisi se bhi khana mangne ki ijazat nahi thi, Aapko kaise pata chala ke main bhookha hu. Aapne jawab diya ki mere Peer Waris Pak ne mujhe ek din pehle hi basharat di thi ke ek Jain sadhu kal aayega, woh 3 din ka bhookha pyaasa hoga, use khana de dena. Jab maine tumhein dekha toh main samajh gaya ke Sarkar Waris Pak ne tumhare aane ki hi khabar di thi. Yeh jawab sunkar woh Jain sadhu hairat zada tha. Jo bhi Aapke ghar aata kabhi khaali pet ya khaali haath nahi jaata. Aaj bhi Aapki Khanqah Sharif ka yeh khaas sa hai ke chaahe jo bhi dharm, maslak, silsile, manyata ka maan ne wala ho, kabhi bhi khaali nahi jaata.

Gareeb, yateem aur zarurat mando ki madad karne ke alawa Aapka bachpan Qur'an Pak ki tilawat, Zikr-O-Fikr, Hadees-E-Nabvi aur Auliya Kiram ke waqiyat padhne mein guzarta. Aap aksar Hazrat Sayed Salar Mas'ood Ghazi Raziallahu Ta'ala Anhu ki mazar sharif pe bhi hazir hua karte. Aapne kaafi arsa Ajmer Sharif aur Himalaya ki gaar mein bhi Zikr-O-Azkar mein guzara hai. Aapke ghar ke qareeb jungle mein Hazrat Abbas Ali Shah Sahab (R.A) ki mazar pe bhi hazir hua karte.

Aap Hazrat Sayed Mashooq Ali Shah Sahab Chishti Nizami Warsi (R.A) se Dakhil-E-Silsila hai jo Hazrat Nizamuddin Auliya Mehboob-E-Ilahi Raziallahu Ta'ala Anhu ki behen Bibi Ruqayya Raziallahu Ta'ala Anha ki aal se hai jo ab Nainital, Haldwani mein aaram farma hai. Aapko ehram sharif Hazrat Sayed Masoom Ali Shah Sahab Warsi (R.A) se ata hua jo ab Babagunj, India-Nepal border ke paas aaram farma hai aur Sarkar Waris Pak ke zamane ke Faqeer hai.

Aap jab Hajj-E-Baitullah ada karne gaye the tab Muhaddis-E-Makkah Mukarrama Hazrat Sayed Muhammad Alvi Sahab (R.A) jo 40 saal Masjid-E-Haram Sharif mein imamat kar chuke hai aur Hazrat Mulana Ziauddin Madni Sahab (R.A) ke mureed hai unhone apne ghar pe Aapki dawat ki thi. Madina Munavvara mein Abul Ulai silsile ke ek buzurg ne Aapko Rauza-E-Rasool Allah ki dhool mubarak tohfe mein di thi. Sarkar Waris Pak ki tarah aap din bhar muqaddas muqamat ki ziyarat karte aur raat bhar ibadat guzar hote. Makkah Mukarrama aur Madina Munawwara ke kaafi log Aapse Dakhil-E-Silsila hue the.

Aap ba Hukm-E-Waris Pak Mumbai mein tashreef farma hue. Bohot se log jo har qism ke nashe aur burai mein mubtila the aur namaz, Qur'an, Zikr-O-Fikr se door door tak naata nahi tha Aapke Dast-E-Haq pe tauba kar ke ba amal zindagi guzarte hue nazar aaye. Jo bhi Aapse Dakhil-E-Silsila hote unko Zikr-E-Ilahi diya jaata jise kar ke woh Sirat-E-Mustaqeem par faaiz hote.

Duniya bhar mein hazaro, laakho log Aapse faizeaab hue aur roohani taraqqi paayi. 'Sapno ka sheher' kehlane wale Mumbai mein Silsila-E-Warisya ka chiragh roshan karne wali Zaat Aapki hi hai.

Sarkar Waris Paak ki tarah khanqah mai sare dharm aur zaat ke logo ijazat hai.
Sabse Badi Silsilaye Warsiya ki khanqah Mumbai inhi ke sarparast mai chalayi jaati hai. South Africa mai WAFSA (Warsi Foundation Of South Africa) jo India aur South Africa mai chal rahi hai wo bhi inhi ke sarparast mai hai jiska maqsad hai gareeb ki zarurat, khana pochana aur bhut se Auliya ka Urs aur Sarkar Waris ki taleem logo tak pocha rahe.

Hazrat Haji Sufi Dr. Faqeer Rafique Ali Shah Warsi ka Ilm aur Muhabbat ne bhut se logo ki zindagi badal di aur Insha Allah hum bhi unke bataye hue raste par chalege.

Aapne 05 May 2022 ko wafat paayi aur apne Khaliq-E-Haqeeqi se jaa mile. Aapka ilm, faiz aur muhabbat aaj bhi aam hai jisse log qayamat tak faizeaab hote rahenge. Aap apne watan Asharfa, Nanpara mein apne baug mein aaram farma hai.